चिखलठाण येथे शनिवारी महाआरोग्य शिबीराचे आयोजन -

करमाळा, दि. 27 (करमाळा-LIVE)-
करमाळा तालुक्यातील चिखलठाण येथे शिवसेना वैद्यकीय मदत कक्षाच्या वतीने शनिवारी सर्व रोग निदान शिबिराचे आयोजन करण्यात आले आहे.

या शिबिरात सर्व रुग्णांची तपासणी करून मोफत औषधे व चष्म्यांचे वाटप केले जाणार असल्याची माहिती जिल्हा परिषदेचे माजी उपाध्यक्ष राजेंद्र बारकुंड व जिल्हा दूध संघाचे माजी उपाध्यक्ष विकासराव गलांडे यांनी दिली आहे.

या शिबिरासाठी नगर, पुणे, सोलापूर येथील हॉस्पिटलचे डॉक्टर तपासणीसाठी येणार आहेत. या आरोग्य शिबिराचे उद्घाटन मुख्यमंत्री वैद्यकीय सहाय्यक कक्ष प्रमुख मंगेश चिवटे, पोलीस उपविभागीय अधिकारी अजित पाटील, पोलीस निरीक्षक ज्योतीराम गुंजवटे, तहसीलदार विजयकुमार जाधव, तालुका कृषी अधिकारी संजय वाकडे, गट विकास अधिकारी राजाराम भोंग, सार्वजनिक बांधकाम विभागाचे वामन उबाळे यांच्यासह तालुक्यातील प्रमुख सर्व कार्यालयीन अधिकारी उपस्थित राहणार आहेत. या शिबिरासाठी चिखलठाण परिसरातील सर्व शाळांच्या विद्यार्थ्यांची तपासणी केली जाणार आहे.