कुंभेज : कष्टकरी कुटुंबातील वैष्णवी पवळ बनली फिजिओथेरपिस्ट! -

दिगंबरराव बागल विद्यालयाच्या वतीने माजी विद्यार्थिनीचा सन्मान

कुंभेज, दि. २५ (करमाळा-LIVE)-

प्रतिकूल आर्थिक परिस्थितीवर मात करत कुंभेज येथील कष्टकरी कुटुंबातील कु. वैष्णवी संगीता शामराव पवळ हिने फिजिओथेरपी क्षेत्रातील पदवी संपादन केली असून, फिजिओथेरपिस्ट म्हणून आपल्या व्यावसायिक कारकिर्दीला सुरुवात केली आहे. तिच्या या उल्लेखनीय यशाबद्दल दिगंबरराव बागल माध्यमिक विद्यालयाच्या वतीने तिचा सत्कार करून अभिनंदन करण्यात आले.

वैष्णवी पवळ ही दिगंबरराव बागल माध्यमिक विद्यालयाची माजी विद्यार्थिनी आहे. शालेय शिक्षण पूर्ण केल्यानंतर तिने महाराष्ट्र आरोग्य विज्ञान विद्यापीठाच्या (MUHS) अंतर्गत कोपरगाव येथील आर.जे.एस. कॉलेज ऑफ फिजिओथेरपीमधून बॅचलर ऑफ फिजिओथेरपी (B.P.Th.) ही पदवी संपादन केली. प्रतिकूल आर्थिक परिस्थितीतही जिद्द, मेहनत आणि चिकाटीच्या जोरावर तिने मिळवलेले यश ग्रामीण भागातील विद्यार्थ्यांसाठी प्रेरणादायी ठरत आहे.

फिजिओथेरपी क्षेत्रातील आधुनिक उपचारपद्धतींचे प्रशिक्षण घेताना तिने कपिंग थेरपी, टेपिंग आणि IASTM या उपचारपद्धतींमध्ये प्रमाणपत्रे प्राप्त केली आहेत. तसेच एस.जे.एस. हॉस्पिटल, कोपरगाव; आशा पुनर्वसन केंद्र, पुणतांबा आणि कोठारी ऑर्थोपेडिक्स, कोपरगाव येथे तिने रुग्णसेवेचा आणि क्लिनिकल कामाचा अनुभव मिळवला आहे.

आपल्या यशानंतर वैष्णवी हिने शिक्षण घेतलेल्या विद्यालयाला भेट देत पूर्वीच्या शिक्षकांची सदिच्छा भेट घेतली आणि विद्यालयाप्रती कृतज्ञता व्यक्त केली. यावेळी मुख्याध्यापक हनुमंत पाटील यांच्या हस्ते तिचा सत्कार करण्यात आला.

ग्रामीण भागातील विद्यार्थ्यांनी शिक्षणाच्या माध्यमातून विविध क्षेत्रांत प्रगती करावी, यासाठी दिगंबरराव बागल माध्यमिक विद्यालयाकडून सातत्याने प्रोत्साहन दिले जाते. विद्यार्थ्यांना शैक्षणिक गुणवत्तेसोबतच शिस्त, मेहनत आणि आत्मविश्वासाचे धडे दिले जातात. वैष्णवीने फिजिओथेरपी क्षेत्रात मिळवलेले यश हे विद्यालयाच्या विद्यमान विद्यार्थ्यांसाठी प्रेरणादायी आहे.

“वैष्णवीचे यश विद्यालयासाठी अभिमानाची बाब”

“आमच्या दिगंबरराव बागल माध्यमिक विद्यालयाची माजी विद्यार्थिनी कु. वैष्णवी पवळ हिने प्रतिकूल आर्थिक परिस्थितीचा बाऊ न करता फिजिओथेरपी क्षेत्रात पदवी संपादन केली, ही विद्यालयासाठी अभिमानाची बाब आहे. ग्रामीण भागातील विद्यार्थ्यांनी शिक्षणाच्या माध्यमातून विविध क्षेत्रांत यश संपादन करून समाजसेवेत योगदान द्यावे, हीच आमची अपेक्षा आहे. वैष्णवीचे यश इतर विद्यार्थ्यांनाही निश्चितच प्रेरणा देईल,” असे मत विद्यालयाचे मुख्याध्यापक हनुमंत पाटील यांनी व्यक्त केले.

“शिक्षकांचे मार्गदर्शन माझ्या यशात मोलाचे”

“दिगंबरराव बागल माध्यमिक विद्यालयात घेतलेले शिक्षण, शिक्षकांनी केलेले मार्गदर्शन आणि दिलेले प्रोत्साहन यांचा माझ्या शैक्षणिक वाटचालीत मोलाचा वाटा आहे. आज फिजिओथेरपिस्ट म्हणून कारकिर्दीला सुरुवात करताना माझ्या शाळेप्रती कृतज्ञता व्यक्त करताना विशेष आनंद होत आहे. माझ्या ज्ञानाचा उपयोग समाजासाठी व्हावा, ही माझी इच्छा होती. रुग्णसेवेच्या माध्यमातून ती पूर्ण होईल, याचा मला मनापासून अभिमान वाटतो,” अशी भावना डॉ. वैष्णवी संगीता शामराव पवळ हिने व्यक्त केली.

वैष्णवीच्या या यशाबद्दल मुख्याध्यापक हनुमंत पाटील, कल्याणराव साळुंके, संतोष शिंदे, विष्णू पोळ आणि दादा जाधव यांनी विद्यालय परिवाराच्या वतीने तिचे अभिनंदन करून पुढील वाटचालीस शुभेच्छा दिल्या.

यावेळी वैष्णवीचे वडील श्यामराव पवळ, आई संगीता पवळ, भाऊ अवधूत पवळ, वहिनी सुचित्रा पवळ तसेच शिक्षकेतर कर्मचारी किशोर कदम, संतोष घोरपडे आणि नंदकुमार कांबळे उपस्थित होते.