उजनी बॕकवॉटर परिसरात चोरांचा धुमाकूळ ; दिवेगव्हाण येथे मोटारीच्या तांब्याच्या तारा चोरीला- प्रशासनाचे दुर्लक्ष
करमाळा, दि. १ (करमाळा-LIVE)-
उजनी धरणाच्या बॅकवॉटर परिसरातील गावांमध्ये सध्या चोरांनी अक्षरशः धुमाकूळ घातला असून १५ ते २० दिवसांच्या अंतराने चोऱ्या करणाऱ्या या टोळीने आता आपली पद्धत बदलली असून, शेतीसाठी जीवनदायी असलेल्या पाण्याच्या मोटारींची केवळ चोरी न करता मोठ्या प्रमाणावर नासधूस करण्यास सुरुवात केली आहे.
दिवेगव्हाण, राजुरी, वाशिंबे, केतूर १, केतूर २, पोमलवाडी, खादगाव, टाकळी, कोंढारचिंचोली, सोगाव, गोयेगाव, रामवाडी, जिंती या उजनी बॅकवॉटरच्या पट्ट्यात हा संतापजनक प्रकार सातत्याने घडत आहे.
पूर्वी हे चोरटे मोटारीतील केवळ तांब्याच्या तारा (वाइंडिंग) चोरून नेत असत, ज्यामुळे शेतकरी काही हजार रुपये खर्च करून मोटार पुन्हा बांधून घेत असत. परंतु आता या चोरांनी अत्यंत विघातक प्रवृत्ती अंगीकारली असून ते संपूर्ण मोटारच हातोड्याने किंवा जड शस्त्राने फोडून उद्ध्वस्त करत आहेत. नुकत्याच दिवेगव्हाण येथे घडलेल्या घटनांमध्ये तब्बल 10 मोटारी या चोरांनी फोडून निकामी केल्या आहेत. या उद्ध्वस्त मोटारींचे धक्कादायक फोटोही समोर आले आहेत.
चोरटे १५ एचपी (15 HP) क्षमतेच्या सरफेस मोटारींचे खालील महत्त्वपूर्ण भाग पूर्णपणे फोडून टाकत आहेत:
पाती (Impeller): पाणी खेचणारी आतील मुख्य पाती पूर्णपणे तोडून टाकली जात आहेत. कूलिंग फॅन (पंखा): मोटार थंड ठेवणारा मागील पंखा आणि त्याचे कव्हर चक्काचूर केले जात आहे. मोटारीची मुख्य बॉडी (Casing): कास्ट आयर्नपासून बनवलेली मोटारीची बाह्य बॉडीच फोडल्यामुळे मोटारीचा सांगाडाच नष्ट होत आहे.
शाफ्ट आणि रोटर: आतील भाग वाकवून मोटार कायमस्वरूपी निकामी केली जात आहे.
शेतकऱ्यांना बसणारा लाखो रुपयांचा फटका पाण्याच्या वर बसवल्या जाणाऱ्या १५ एचपीच्या एका नवीन मोटारीची बाजारातील किंमत साधारणपणे ८५ हजार ते लाखांच्या घरात असते. चोरांनी मोटारीची अवस्था इतकी भयानक केली आहे की, तिची दुरुस्ती करणे आता कोणत्याही मेकॅनिकला शक्य राहिलेले नाही. त्यामुळे लाखो रुपये खर्च करून नवीन मोटार बसवण्याशिवाय शेतकऱ्यांसमोर दुसरा कोणताही पर्यायच उरलेला नाही.
एकीकडे शेतीमालाला भाव नाही दुष्काळ पडलेला आहे आणि दुसरीकडे एका रात्रीत लाखो रुपयांच्या रुपयांच्या मोटारीचे नुकसान, यामुळे या परिसरातील शेतकरी प्रचंड आर्थिक संकटात सापडला आहे. प्रशासनाने आणि पोलिसांनी या बॅकवॉटर परिसरात रात्रीची गस्त वाढवून या तोडफोड करणाऱ्या टोळीचा तात्काळ बंदोबस्त करावा, अशी तीव्र मागणी आता जोर धरू लागली आहे.
पोलिसांच्या निष्क्रियतेमुळे चोरांचे फावले! उजनी बॅकवॉटर परिसरात आंतरजिल्हा टोळीचा धुमाकूळ, पोलिसांची केवळ बघ्याची भूमिका
या गंभीर प्रकाराकडे पोलिसांचे पूर्णपणे दुर्लक्ष असल्याने चोरांचे धाडस आता प्रचंड वाढले आहे.
पोलिसांच्या निष्क्रियतेमुळेच चोरट्यांनी आता केवळ तांब्याच्या तारा चोरण्याऐवजी शेतकऱ्यांच्या १५ एचपीच्या (15 HP) लाखमोलाच्या मोटारी पूर्णपणे उद्ध्वस्त करण्याचा सपाटा लावला आहे.
पोलिसांची गस्त गायब, तपासाला शून्य गती एकापाठोपाठ एक अनेक गावांमध्ये एवढ्या मोठ्या प्रमाणावर आणि एका विशिष्ट अंतराने चोऱ्या होत असतानाही पोलिसांकडून या भागात कोणतीही गस्त (Night Patrolling) घातली जात नसल्याचे धक्कादायक वास्तव समोर आले आहे. एकाच पद्धतीने आणि एवढ्या मोठ्या भौगोलिक पट्ट्यात या घटना घडत असल्याने यामागे एखादी मोठी आंतरजिल्हा किंवा आंतरराज्य संघटित टोळी सक्रिय असल्याचा दाट संशय आहे. मात्र, या टोळीचा छडा लावण्यासाठी किंवा आरोपींच्या मुसक्या आवळण्यासाठी पोलिसांकडून अद्याप कोणतेही विशेष तपास पथक पाठवण्यात आलेले नाही.
पोलिसांकडून कोणतीही ठोस ॲक्शन घेतली जात नसल्याने आणि एकाही आरोपीला अद्याप अटक न झाल्याने गुन्हेगारांमधील पोलिसांचा धाक पूर्णपणे संपल्यात जमा आहे.
केवळ तांब्याची तार नेल्यास शेतकरी ती पुन्हा दुरुस्त करेल, परंतु पोलिसांची कोणतीही भीती नसल्याने ते आता मोटारीचे पंखे, पाती आणि संपूर्ण लोखंडी सांगाडाच हातोड्याने किंवा घातक शस्त्राने फोडून उद्ध्वस्त करत आहेत.
शेतकऱ्यांना लाखोंचा फटका, पोलिसांच्या कारवाईची प्रतीक्षा
पोलिसांच्या या ढिम्म कारभारामुळे शेतकऱ्यांना मात्र नाहक लाखो रुपयांचा भुर्दंड सहन करावा लागत असून, नवीन मोटार बसवण्याशिवाय त्यांच्याकडे दुसरा कोणताही पर्याय उरलेला नाही. आधीच निसर्गाच्या लहरीपणामुळे आणि दुष्काळामुळे मेटाकुटीला आलेला शेतकरी आता या चोऱ्यांमुळे आर्थिक गर्तेत ढकलला जात आहे.
या प्रकरणाचे गांभीर्य ओळखून रात्रीची गस्त कडक करावी आणि या संघटित टोळीला बेड्या ठोकून कठोर कारवाई करावी, अशी संतप्त मागणी आता शेतकरी वर्गातून माध्यमातून केली जात आहे. नाहीतर रस्त्यावर येऊन उग्र आंदोलन करणार असल्याचे दिवेगव्हाण भागातील शेतकऱ्यांनी सांगितले .
सोलापूर ग्रामीण चे पोलीस अधीक्षक अतुल कुलकर्णी यांनी स्वतः लक्ष घालण्याची गरज
स्थानिक पोलिसांच्या या निष्क्रियतेमुळे आणि हलगर्जीपणामुळे शेतकरी अक्षरशः हवालदिल झाला आहे. त्यामुळे आता या गंभीर प्रकरणात सोलापूर ग्रामीणचे पोलीस अधीक्षक (SP) अतुल कुलकर्णी यांनी स्वतः तातडीने लक्ष घालावे, अशी आर्त साद शेतकरी वर्गातून घातली जात आहे. या संघटित टोळीचा कायमचा बंदोबस्त करण्यासाठी पोलीस अधीक्षकांनी विशेष तपास पथके स्थापन करून गुन्हे शोधासाठी तातडीने रवाना करावीत आणि या आरोपींच्या मुसक्या आवळून शेतकऱ्यांना न्याय द्यावा, अशी अत्यंत रास्त आणि तीव्र मागणी आता जोर धरत आहे.
एकीकडे दुष्काळाच्या झळांनी करमाळा तालुक्यातील शेतकरी होरपळून निघालाय… पिकांना पाणी देण्यासाठी शेतकऱ्यांनी कष्टाने उभ्या केलेल्या शेती ला जगवणाऱ्या मोटारीच आता चोरट्यांकडून लक्ष्य केल्या जात आहेत. मोटारी चोरीला जाणं एवढ्यावरच हा प्रकार थांबलेला नाही, तर लाखो रुपयांचं नुकसान करून शेतकऱ्यांना अक्षरशः मेटाकुटीला आणलं जात आहे.
दुष्काळात शेती वाचवण्यासाठी धडपडणाऱ्या शेतकऱ्यांच्या जखमेवर चोरट्यांनी मीठ चोळलं आहे. त्यामुळे या मोटार चोरीच्या घटनांची गांभीर्याने दखल घेऊन पोलिसांनी चोरट्यांचा तातडीने बंदोबस्त करावा, तसेच नुकसानग्रस्त शेतकऱ्यांना शासनाने मदतीचा हात द्यावा, अशी मागणी आता जोर धरू लागली आहे.
About The Author
